Европын АШТ-ий нээлтийн өдөр эмх замбараагүй байдал үүсгэсэн Оросын хөгжөөн дэмжигчид шигшээ баг нь хэсгийн

хоёр дахь тоглолтод зохион байгуулагч орон Польштой тоглосны дараа мөн л үймээн дэгдээлээ. Тоглолт болсон энэ өдөр Оросын тусгаар тогтнолын өдөр тохиосон бөгөөд Варшавын төв гудамжаар төрийн далбаагаа намируулан сүртэйгээр жагсаж явсан оросуудад эртнээс тийм ч таатай харилцаатай байгаагүй Польшийн фанатууд дургүйцэж, үг сөргөлдсөнөөс олныг хамарсан зодоон үүссэн байна. Хэдэн арав, зуугаараа зодолдож эхэлсэн хоёр багийн хөгжөөн дэмжигчид сүүлдээ улайрцгааж, төмөр, лонхоор бие биеэ шидэлцсэнээс цөөнгүй хүн гэмтжээ. Цагдаагийнхан хүч нэмэгдүүлэн байж орос, польшуудыг салгасан байна.