Гэмт хэрэг::

 Халаасны хулгайн илрүүлэлт 49,2 хувь байдаг 



Манай улсад халаасны хулгайн гэмт хэрэг өдөр тутам тохиолддог энгийн үзэгдэл мэт болсон гэхэд хилсдэхгүй. Нийтийн тээврээр зорчиж байхад заавал хэн нэгэн эд зүйлээ хулгайд алдаж байгаатай таарна, эсвэл өөрөө хохирогч болж гар утас, хэтэвч зэргээ алдана. Гэтэл энэ тохиолдолд ард иргэд хулгайд алдсан эд зүйлээ тэр бүр цагдаад тэмдэглэж бүртгүүлдэггүй тэгсхээд орхидог нь энэ төрлийн гэмт хэргийг илэрдэггүй гэж үздэгтэй холбоотой болов уу. Харин Нийслэлийн цагдаагийн газрын гэмт хэрэгтэй тэмцэх газраас цаашид хулгайн гэмт хэргийг бууруулах, илрүүлэлтийг нэмэгдүүлэх зорилгоор халаасны хулгай хийдэг 365 сэжигтэн этгээдийн бүртгэл судалгааг шинэчлэн гаргасан байна.

Энэ төрлийн гэмт хэрэг үйлддэг 36 бүлэг, хүмүүсийг илрүүлэн бүртгэл судалгаанд хамруулсны үр дүнд 2014 оны эхний хоёр сарын байдлаар халаасны хулгайн гэмт хэрэг 76 бүртгэгдэн шалгагджээ. Энэ нь өнгөрсөн оны мөн үеийнхтэй харьцуулахад 2,7 хувиар буурч, бүртгэгдсэн нийт хэргийн 36-г илрүүлж, хэргийн илрүүлэлт 49,2 хувьтай байгаа гэнэ. Энэхүү тоо баримтаас харахад ард иргэд хулгайд алдсан эд зүйлээ цагдаагийн байгууллагад бүртгүүлэх нь маш бага байгаа юм. Тиймээс хулгайд ямар нэгэн байдлаар эд зүйлээ алдсан бол цагдаагийн байгууллагад нэн даруй бүртгүүлж байхыг зөвлөж байна.